Poezija članova

Va staroj kuće na kraj sela biva nona Tonca. Žive sama va mizerije,a jedina bogatija joj je unuka i par morčići ki joj svete na ušah.

Dobila ih je od pokojnega muža i čuva ih ko sa blaga sveta.Unuku vidi retko, aš biva va grade. Zadnji dani se više misli na nju aš će brzo Mikulova.Volela bi njoj neš parićat,ma nima od kuda: Ah, ni mi druge nego moji morčići prodat da zaslužin ki solad - reče jako dišperana. Morčiću se j' to jako grdo videlo,naročito onemu levemu. Nikako se ni mogal s ten pomirit i odlučil je pobeć.

Kad se j' nona jutro pred zrcalo šla oplest,videla je da joj levega Morčića ni: Majko Božja,sad niman ni morčića! A ni regal neću moć kupit. Utela se j' zmutit od žalosti i brige.

Se je nopak obrnula i se obašla za morčićen.A kad je va kamare pod ormarun pošpijala, zagledala je neku škatulu.Nutra je bila porculanska pupa na ku je skroz pozabila bila: Baš lepo da san pupu našla,za Mikulovu ću ju unuke regalat- vesela je bila- Ka lepa pupa. Rado ću se z njun igrat.- Unuka je bila Kuntenta z regalun, a i nona.jedino joj je bilo žal ča je morčića zgubila.

Morčić je skriven se to gledal i. bilo mu je žal none. Brižna nona ,tako je dobra i skrbna.Ni zaslužila da bez morčića ostane Drugo jutro , kad je nina puneštru otprla, va kantuniće se j' na svetle morčić zasvetlel.